د پلان او ستراتیژیکي همغږۍ رئیس د اسلامي آزاد پوهنتون رئیس سره خبرې اترې وکړې
د تخنيکي او مسلکي زده کړو ادارې د پلان او ستراتيژيکي همغږۍ رئيس مولوي نېک محمد نېکمل په کابل کې د ايران د اسلامي آزاد پوهنتون له رئيس ډاکټر علي صادقي سره وکتل.
په دغه کتنه کې د ایران آزاد اسلامي پوهنتون د تخنیکي او مسلکي زده کړو ادارې او د آزاد اسلامي پوهنتون ترمنځ د همکاریو پر محور خبرې وشوې.
د آزاد اسلامي پوهنتون پلاوي د تخنيکي او مسلکي زده کړو ادارې د ښوونکو او کارکوونکو لپاره د ظرفيت لوړونې کورسونو په جوړولو او په هرات کې د یو ګډ فني نوښت مرکز په جوړولو کې د همکارۍ ژمنه وکړه.
ښاغلي نیکمل د اسلامي آزاد پوهنتون د همکاریو قدرداني وکړه او د تخنیکي او مسلکي زده کړو ادارې د همکارۍ ډاډ یې ورکړ.
نوموړي وويل، د تخنيکي او مسلکي زده کړو يو شمېر مرکزونه د خپلو وسايلو او تجهیزاتو د کارولو لپاره تخنيکي همکارۍ ته اړتيا لري. د اسلامي آزاد پوهنتون رئيس د دغو تجهيزاتو د نوملړ غوښتنه وکړه او په دې برخه کې يې د همکارۍ ژمنه وکړه.
هوکړه وشوه چې د همکارۍ د تحقق لپاره به د همغږۍ په موخه ناستې دوام ولري.
