د نیما انسټیټوټ زده کړیالانو فراغت غونډه ترسره شوه
د ادارې او مدیریت ملي انسټیټوټ (نیما) د اوولسمې دورې فارغانو د فراغت غونډه د تخنیکي او مسلکي زده کړو ادارې د رئیس مولوي غلام حیدر شهامت په حضور کې ترسره کړه.
په دې مراسمو کې د کمپیوټر ساینس، اداره او مدیریت او حسابدارۍ څانګو ۴۴ تنو فارغانو خپل فراغت ولمانځه.
مولوي شهامت په دې مراسمو کې د علم پر زده کړې ټينګار وکړ او ويې ويل چې د اسلام ستر لارښود ته د الله (ج) لومړى حکم لوستل دی.
هغه زیاته کړه چې د علم په زده کړه کې د وخت او ځای محدودیت نشته.
د تخنیکي او مسلکي زده کړو ادارې رئیس زده کړیالانو ته د فراغت مبارکي وویله او له هغوی یې وغوښتل چې فکر وکړي چې دوی د افغانستان رهبران دي. هغه زياته کړه، چې په دې احساس او مسووليت سره به هېواد اباد شي.
مولوي شهامت ټینګار وکړ چې د لویدیځو ټولنو پرمختګ د هغوی د علم له امله دی.
نوموړي همدا راز زیاته کړه، چې فارغانو ته د کاري فرصتونو د برابرولو په موخه به د دوی کار د تخنیکي او مسلکي زده کړو له ادارې څخه پیل شي.
په دې مراسمو کې د زده کوونکو او زده کړیالانو چارو رئيس سيد عباس ايوبي هم وينا وکړه او ويې ويل، چې فارغين له دې وروسته ستر مسووليت لري. نوموړي له زده کړیالانو وغوښتل، چې د خلکو او ټولنې د خدمت په برخه کې له هېڅ ډول هڅې ډډه ونه کړي.
ايوبي زياته کړه، چې د تخنيکي او مسلکي زده کړو اداره هڅه کوي، چې د تخنيکي او مسلکي مرکزونو فارغانو ته د کار زمينه برابره او خپلو زده کړو ته دوام ورکړي.
په دې مراسمو کې د استقلال لوړو زده کړو موسسې علمي مرستیال عبدالفغار سیغاني هم حضور درلود او ویې ویل، چې هر کال د نیما انسټیټوټ ممتاز زده کړیالان دغې ښوونیزې موسسې ته جذبیږي.
ښاغلي سیغاني وویل، چې د یاد هوکړه لیک پر بنسټ د استقلال لوړو زده کړو موسسه د نیما انسټیټوټ زده کړیالانو ته ځانګړی تخفیف ورکوي.
ورپسې احمدجان د فارغانو په استازيتوب خبرې وکړې او ويې ويل، چې له ډېرو ستونزو سره سره په دې وتوانېده، چې د انسټیټوټ دوره پاى ته ورسوي. نوموړي له نورو ځوانانو وغوښتل، چې په هېڅ ډول شرايطو کې باید له زده کړو پاتی نه شی او د افغانستان د ابادۍ لپاره کار وکړي.
