د ننګرهار له ټولګټو چارو ریاست سره د همغږۍ ناسته ترسره شوه
د ننګرهار د تخنیکي او مسلکي زده کړو آمریت مسئولین وایي، چې د ګډو همکاریو د پیاوړتیا او لا زیاتې همغږۍ په موخه یې د دغه ولایت له ټولګټو چارو ریاست سره د همغږۍ ناسته ترسره کړې ده.
په دې ناسته کې د ننګرهار د تخنیکي او مسلکي زده کړو آمر مولوي محمد طاهر جلالي، د دغه ولایت د ټولګټو چارو رئیس مولوي احمد احمدي او د دواړو ادارو استازو ګډون کړی و. ګډونوالو د دواړو ادارو ترمنځ د ترسره شوي تفاهملیک د لا ښه تطبیق او د ګډو همکاریو د پیاوړتیا په اړه بحث او د نظرونو تبادله وکړه.
په ناسته کې د تفاهملیک د تطبیق، د زدهکړیالانو د ظرفیت لوړونې او د عملي زدهکړو د زمینې برابرولو په اړه هم خبرې وشوې.
همداراز، دواړو لورو ټینګار وکړ چې د ننګرهار د تخنیکي او مسلکي زده کړو د مرکزونو زدهکړیالانو ته به د ټولګټو چارو ریاست په همکارۍ د سړک جوړونې، ساختماني چارو، د ساختماني موادو د کیفیت کنټرول او بېلابېلو لابراتواري او ساحوي ازموینو په برخو کې د عملي تجربو د ترلاسه کولو زمینه برابره شي.
د ننګرهار د تخنیکي او مسلکي زده کړو آمریت مسئولین وایي، چې د عملي زدهکړو پیاوړتیا د زدهکړیالانو د مسلکي مهارتونو د لوړولو لپاره مهمه ده.
دا په داسې حال کې ده چې د تخنیکي او مسلکي زده کړو ادارې مشرتابه تل په تخنیکي او مسلکی مرکزونو کې د عملي زدهکړو پر پیاوړتیا ټینګار کړی دی.
