د ننګرهار د تخنیکي او مسلکي زده کړو آمریت برښنايي موټر جوړوي
د ننګرهار د تخنیکي او مسلکي زده کړو آمریت داسې طرحه جوړه کړې، چې له مخې به یې په نړیوال معیار برابر برښنایی موټر جوړ کړي.
د ننګرهار د تخنيکي او مسلکي زده کړو آمر فضل الباري نصرت د یاد ولايت تخنيکي او مسلکي مرکزونو د يو شمېر استادانو په شتون کې د دغه طرحې عملي کېدو څرنګوالي په اړه د ننګرهار ولايت له مرستيال والي محمد رباني ناصح سره خبرې اترې وکړې.
په دغه لیدنه کې د ننګرهار تخنيکي او مسلکي آمر وويل«د برښنايي موټر د جوړولو طرحې پر بنسټ به دغه موټر د لمريزې انرژۍ په وسيله چلېږي او د اتو مسافرو ظرفيت به ولري».
ښاغلي نصرت دا هم وویل، چې د دغه موټر ټولې پرزې به د ننګرهار د تخنیکي او مسلکي زده کړو په آمریت کې جوړې شي.
د ننګرهار ولايت مرستيال والي مولوي محمد رباني ناصح د برښنايي موټر د جوړولو طرحې د ستاينې پر مهال؛ نوموړي د دغه طرحې د عملي کېدو په اړه د ننګرهار د تخنيکي او مسلکي زده کړو آمریت مسوولينو ته ډاډ ورکړ.
