د میدان وردګ د تخنیکي او مسلکي زده کړو آمریت له خوا فراغت غونډه ترسره شوه
د میدان وردګ ولایت د تخنیکي او مسلکي زده کړو آمریت له لوري د یاد ولایت د تخنیکي او مسلکي زده کړو له مرکزونو څخه د محصلینو د څوارلسمې دورې فراغت غونډه جوړه شوه.
په دې مراسمو کې د سیمه ییزو چارواکو تر څنګ، د تخنیکي او مسلکي زده کړو ادارې سرپرست محترم مولوي غلام حیدر شهامت او د چارو ادارې رئیس شیخ نورالحق انور هم ګډون کړی و او وینا یې هم وکړې.
نوموړو په یاد پروګرام کې د خپلو ویناوو په ترڅ کې فارغانو ته د مبارکۍ ترڅنګ، د تخنیکي او مسلکي زده کړو پر اهمیت ټینګار وکړ او دا یې هم وویل چې د تخنیکي او مسلکي زده کړو ادارې له پروګرامونو څخه ملاتړ کوي.
په همدې حال کې دتخنيکي او مسلکي زده کړو ادارې سرپرست په دغو مراسمو کې د یادې ادارې ځينې لاسته راوړنې هم بيان کړې .
په ورته وخت کې د چارو ادارې لوی رئیس د خپلو خبرو په ترڅ کې د تخنیکي او مسلکي زده کړو ادارې له پروګرامونو څخه د ملاتړ ترڅنګ زیاته کړه چې تخنیکي او مسلکي زده کړې د هېواد د پرمختګ او ودې لامل کېږي.
د دې مراسمو نورو ويناوالو په اقتصادي وده کې د تخنيکي او مسلکي زده کړو پر رول د ټينګار ترڅنګ د تخنيکي او مسلکي زده کړو د مرکزونو له فارغانو وغوښتل چې د هېواد د پرمختګ لپاره لا زيات زیار او کوښښ وکړي.
د مراسمو په پای کې فارغانو ته ستاینلیکونه ورکړل شول او غونډه په دعایې پای ته ورسیده.
