د خوست ولایت تخنيکي او مسلکي زده کړو د مرکزونو فارغانو د فراغت مراسم ترسره شول
د خوست ولایت د تخنیکي او مسلکي زده کړو مرکزونو د ۲۵۰ تنو فارغانو محصلینو د فراغت مراسم د یاد ولایت د سیمه ییزو چارواکو په حضور کې ترسره شول.
دغه محصلين د کمپيوټر ساينس، ساختمان، برښنا، وترنرۍ، کرنې او اقتصاد له څانګو فارغ شول.
په دغې مراسمو کې د مرستيال والي مولوي محبوب شاه قانت ترڅنګ د دغه ولايت د ملکي او نظامي ادارو يو شمېر استازو هم حضور درلود.
د خوست ولایت مرستيال والي د یاد ولایت تخنيکي او مسلکي زده کړو مرکزونو د فراغت په مراسمو کې زده کوونکو ته د فراغت مبارکي وويله او زياته يې کړه، چې هڅه کوي د دوی لپاره کاري چاپيريال برابر کړي.
د خوست میخانیکي انسټیټوټ امر مظلوم صبري راغلو میلمنو ته ښه راغلاست ووایه او د میخانیکي انسټیټوټ په اړه یې معلومات وړاندې کړل.
نوموړي زیاته کړه چې اوس د خدمت وخت دی او حکومت ژمن دی چې د ځوانانو ټول ظرفیتونه په کار واچوي.
د مراسمو په دوام کې نورو ويناوالو هم د هېواد په اقتصادي وده کې د تخنيکي او مسلکي زده کړو رول مهم وباله او په هېواد کې يې د تخنیکي او مسلکي زده کړو پر ملاتړ یې ټينګار وکړ.
