د تخنیکي او مسلکي زدکړو ادارې سرپرست د کندهار د تخنیکي او مسلکي زدکړو له اړوندو مسوولانو سره په یوه ځانګړې اداري غونډه کې وکتل
د تخنیکي او مسلکي زدکړو ادارې سرپرست محترم مفتي فضل الرحمن فاضل کندهار ته د یو رسمي سفر په ترڅ کې د دغه ولایت د ولایتي امر ښاغلي سید سمیع الله قریشی د اړوندو ښوونیزو مرکزونو له مسوولانو، اداري کارکوونکو او استادانو سره ناسته ترسره کړه.
په دې اداري ناسته کې چې د یادو مراکزو د تشکیل ، تدریسي بهیر په اړه ستونزې، غوښتنې او وړاندیزونه مطرح شول، د تخنیکي او مسلکي زدکړو ادارې سرپرست ډاډ وښود چې د یادو مراکزو د ستونزو د حل او د تشکیل بشپړولو په برخه کې به لازمې هڅې وکړي.
محترم مفتي صاحب د درسونو د کیفیت په اړه استادانو ته د پام وړ لارښوونې وکړې او له اړوندو مسوولانو یې وغوښتل، ترڅو په دې برخه کې جدي واوسي او د امکاناتو په برابرولو کې لازم اقدامات وکړي.
په پای کې د ادارې سرپرست د هغوی له کړنو خوښي وښوده او د راتلونکي نسل د روزلو په برخه کې یې د استادانو هلې ځلې د افتخار وړ وبللې.
