د تخنیکي او مسلکي زده کړو ملي ادارې له خوا د کار موندنې او کار پنځونې سیمینار پیل شو
د تخنیکي او مسلکي زده کړو ملي ادارې د برنامو د څیړنې او تضمین کیفیت ریاست د کار موندنې او کار پنځونې د مهارتونو سیمینار جوړ کړ.
په دې سیمینار کې د کابل ولایت د تخنیکي او مسلکي زده کړو د مرکزونو شاوخوا ۲۰ تنه استادانو ګډون کړی ، چې په یاد سیمینار کې په استادانو ته د زده کوونکو د کار موندنې د ظرفیت لوړولو او د کار موندنې د څرنګوالي په اړه د پنځو ورځو لپاره روزنه ورکړل شي.
د یاد پروګرام د پرانیستې په مراسمو کې محترم مولوي غلام سعید احساس وویل، چې په اسلامي نظام کې دنده ترسره کول د خدای په نزد لوی اجر او ثواب لري.
محترم مولوي احساس دا همداراز څرګنده کړه چې د خدای په نزد د استاد او ښوونکي مقام ډیر لوړ دی. نوموړي همدارنګه له استادانو وغوښتل، چې خپلې دندې په لازمه توګه او د خدای تعالی د رضایت په نیت سره ترسره کړي.
له بلې خوا مفتي سيد محسن سادات د دغه ښوونيز سيمينار د پرانستلو په مراسمو کې د وینا پر محال وويل چې د دغه ښوونيز پروګرام له ترسره کيدو څخه يې موخه د تخنيکي او مسلکي زده کړو مرکزونو د ښوونکو د کار پنځونې په برخه کې د وړتياوو لوړول او پياوړي کول دي.
مفتي سادات په خپلو خبرو په ترڅ کې د پرو ګرامونو د څيړنې او تضمين کیفیت ریاست ځينې لاسته راوړنې هم په ګوته کړې او ويې ويل، چې یاد رياست هڅه کوي چې د تخنيکي او مسلکي زده کړو مرکزونو د فارغانو لپاره له موسساتو او ادارو سره د تفاهم له لارې د کار زمينه برابره کړي.
دغه راز په دغه پروګرام کې د تخنيکي او مسلکي زده کړو ملي ادارې وياند محترم محمد عثمان الماس د الحاج مولوي غلام حيدر شهامت ويناوو ته په اشارې سره زياته کړه چې په افغانستان کې د بېکارۍ ستونزه د مسلکي او حرفوي کسانو د کمښت له امله رامنځته شوې ده.
د دې مراسمو په دوام کې د تخنیکي او مسلکي زده کړو ملي ادارې د پروګرامونو د څیړنې او تضمین کیفیت ریاست د کارشناسانو له خوا د سیمینار د وړاندې کولو لړۍ په رسمي ډول پیل شوه چې د پنځه ورځو لپاره به دوام وکړي.
دا په داسې حال کې ده چې تر دې وړاندې د تخنيکي او مسلکي زده کړو ادارې د افغانستان د غوره ابتکاراتو او نوښتونو د ملي نندارتون په پرانيستلو سره لسګونو نوښتګرو او خلاقو ځوانانو ته د کار زمينه برابره کړې ده.
