د تخنیکي او مسلکي زده کړو مستقلې ادارې سرپرست د ناروې کډوالو شورا له چارواکو سره وکتل
د تخنيکي او مسلکي زده کړو مستقلې ادارې سرپرست مولوي غلام حيدر شهامت د ناروې کډوالو شورا (NRC) له چارواکو سره وکتل.
په دې کتنه کې دواړو لورو د تخنیکي او مسلکي زده کړو ادارې او د ناروې کډوالو شورا ترمنځ د تخنیکي او مسلکي زده کړو لنډ مهاله روزنیزو دورو جوړولو په موخه د همکارۍ هوکړه لیک لاسلیکولو ته چمتوالی وښود.
د تخنیکي او مسلکي زده کړو ادارې سرپرست ټینګار وکړ چې دغه هوکړه لیک باید ستراتیژیک وي او د پروګرامونو ټول جزئیات په کې شامل وي.
ښاغلي شهامت وویل:« د پروګرامونو په پلې کیدو کې باید د هر ډول فساد مخه ونیول شی او روڼتیا تامین شي.»
د تخنيکي او مسلکي زده کړو ادارې سرپرست د دغه ادارې ځانګړو زده کړو په برخه کې د ناروې د کډوالو شورا د همکارۍ غوښتنه وکړه.
په افغانستان کې د ناروې کډوالو شورا مشر پره چیتا شیتي هم د پروژو په پلې کیدو کې پر روڼتیا ټینګار وکړ او ویې ویل چې د هوکړه لیک اړوند ټول مسایل به په کې شامل وی.
هغه وويل، د ناروې کډوالو شورا په خپلو پروګرامونو کې په لرو پرتو سيمو کې د کوچنيو سوداګرو ملاتړ کوي.
