د تخنیکي او مسلکي زده کړو ادارې رهبري غونډه جوړه شوه
د تخنيکي او مسلکي زده کړو ادارې د رهبرۍ غونډه د دغه ادارې سرپرست مولوي غلام حيدر شهامت او مرستیالانو په مشرۍ جوړه شوه.
په دې کتنه کې د زده کوونکو او زده کړیالانو د جذب پر څرنګوالي، د مسلکي استادانو په ګمارني او د تخنیکي او مسلکي زده کړو ادارې د زده کړه ییزو مرکزونو د ارزونې لپاره د یوې کمیټې د جوړولو په اړه خبرې وشوې.
د غونډې په پيل کې د تخنیکي او مسلکي زده کړو ادارې د اکاډمیکو چارو مرستیال استاد نورمحمد عزيزي د زده کوونکو او زده کړیالانو د جذب په اړه معلومات ورکړل او ويې ويل، چې په دې برخه کې پرمختګونه شوي دي. د هغه په وينا، د تېر کال په پرتله په يو شمېر ولايتونو کې د زده کوونکو شمېر زيات شوى دى.
عزيزي زياته کړه، چې د تخنیکي او مسلکي زده کړو ادارې په روزنيزو مرکزونو کې د زده کوونکو او زده کړیالانود حذب په برخه کې د همکارۍ په موخه له پوهنې وزارت سره خبرې روانې دي. هغه زیاته کړه، وزارت ورسره د همکارۍ ژمنه کړې او دا کار به د زده کوونکو د شمولیت په زیاتولو کې اغېزمن تمام شي.
دپوهنې وزارت دتخنيکي او مسلکي فعاليتونو دڅانګې د روزنيزو مرکزونو د فارغانو د دندو دڅرنګوالي په دوام کې دغو مرکزونو ته د محصلانو د جلب او جذب په لاره کې د زده کړو معينيت مهم وباله .
د تخنيکي او مسلکي زده کړو ادارې مالي او اداري چارو مرستيال مفتي فضل الرحمن فاضل هم ټينګار وکړ چې د زده کوونکو په برخه کې بايد د کار بازار ته جدي پاملرنه وشي.
ښاغلي فاضل د زده کړیالانو په جذب کې د ولایتي امرین رول مهم وګاڼه او ویې ویل چې دوی باید په دې برخه کې کار وکړي.
د انساني سرچېنو رئيس عبدالوارث سکندري وړانديز وکړ، چې د مسلکي استادانو په ګمارنه کې بايد د رقابتي استادان وګمارل شئ.
ښاغلي سکندري همدا راز وړاندیز وکړ چې د ولایتي امرینو د ګمارنې او د هغوی د کړنو د ارزونې لپاره دې مشخص معیارونه وضع شي.
د تخنيکي او مسلکي زده کړو ادارې سرپرست غلام حيدر شهامت د ګډونوالو خبرې واوريدې او ددې ادارې پر کيفيت يې ټينګار وکړ.
نوموړي د تخنيکي او مسلکي زده کړو ادارې له چارواکو د لا زياتو هلو ځلو غوښتنه وکړه او ويې ويل، چې په ټولنه کې باید ددې ادارې دریځ ثابت شي.
