د تخنیکي او مسلکي زده کړو ادارې د کابردی علومو پوهنتون د جوړولو لپار د اروپايې ټولنې همکاري
د تخنيکي او مسلکي زده کړو ادارې سرپرست ښاغلی مولوي غلام حيدر شهامت په افغانستان کې د اروپايي اتحاديې د تخنيکي ټيم له غړي ويليم ون سره د خپل کار په دفتر کې وکتل.
په دې کتنه کې ښاغلي شهامت د تخنیکي او مسلکي زده کړو ادارې د کابردی علومو د پوهنتون د جوړولو پلان تشریح کړ.
ویلیم ون وویل، اروپايي ټولنه د تخنیکي او مسلکي زده کړو له ادارې سره چې د افغانستان اقتصاد ته په کتو یوه حیاتي اداره ده، د ملاتړ لپاره ځانګړې لېوالتیا لري.
هغه ژمنه وکړه چې اروپايي ټولنه به د کابردی علومو د پوهنتون په جوړولو کې به مالی همکاري وکړي. د اروپايي اتحادیې د تخنیکي ټیم غړي وویل چې نجونې او هلکان باید په پوهنتون کې زده کړو ته مساوي لاسرسی ولري.
نوموړي په دې برخه کې له فساد سره د افغان حکومت د مبارزې هرکلى وکړ او ويې ويل چې اروپايي ټولنه له فساد څخه پاکه همکاري غواړي.
د تخنیکي او مسلکي زده کړو ادارې مشر د نارینه او ښځینه ماهرو ځواک د روزنې په برخه کې د اروپايي ټولنې د اوږدمهاله همکاریو پر اهمیت ټینګار وکړ او له مرستو څخه یې په اغیزمنه استفادې ټینګار وکړ.
هغه وويل، که په تېرو شلو (20) کلونو کې له افغانستان سره د نړيوالې ټولنې مرستې په سمه توګه کارول شوې واى، نن به د هېواد اقتصادي وضعيت ښه و.
د تخنيکي او مسلکي زده کړو ادارې مشر ډاډ ورکړ، چې حکومت د ښځینه وو د زده کړې په برخه کې کومه ستونزه نه لري، ځکه چې د اسلام د مقدس دين په چوکاټ کې زده کړه د هر انسان اساسي حق دی.
هغه وويل: "موږ غواړو چې ښځې په خوندي چاپېريال کې زده کړې وکړي، او حکومت په دې برخه کې په هوښيارۍ سره کار کوي."
د تخنيکي او مسلکي زده کړو ادارې مشر له فساد سره پر مبارزې د ټينګار تر څنګ وويل، له هر ډول فساد سره مبارزه له تېرو شلو کلونو د جهاد له ارمانونو څخه ده.
