د تخنیکي او مسلکي زده کړو اداره کې د ناشنوایانو لپاره د درسي کتابونو تألیف پیل شو
د تخنیکي او مسلکي زده کړو ادارې اړوند د تعلیمي نصاب ریاست د ناشنوایانو لپاره د درسي کتابونو د لیکلو او تالیف بهیر د پیل خبر ورکوي.
د تعلیمي نصاب ریاست د مسوولینو په وینا، په دغه کتابونو کې د آمادګۍ دورې کتابونه شامل دي چې د ځانګړو زده کړو په مرکزونو کې د شاملو زده کوونکو لپاره تألیف شوي دي.
د اوریدلو معلولیت لرونکو زده کوونکو لپاره د درسي کتابونو د لیکلو په افتتاحیه پروګرام کې استادانو او د چارو کارپوهانو خپل نظریات او لیدلوري وړاندې کړل.
نوموړو ټینګار وکړ چې تعلیمي نصاب د زده کوونکو د زده کړې د څرنګوالي لپاره خورا مهم دی او باید د یاد نصاب د چمتو کولو او تالیف په برخه کې ډيره پاملرنه وشي.
د يادونې وړ ده، چې اوسمهال د تخنيکي او مسلکي زده کړو په ځانګړو مرکزونو کې لسګونه د اوریدلو معلوليت لرونکي کسان په زده کړو بوخت دي.
