د تخنيکي او مسلکي زده کړو ادارې سرپرست ښاغلي مولوي غلام حيدر شهامت د سمنګان له والي سره وکتل
ښاغلي مولوي غلام حیدر شهامت ولایتونو ته د خپل سفر په دوام کې د سمنګان له والي ښاغلي مولوي عبدالاحد فضلي سره وکتل او خبرې اترې یې وکړې.
په دغې کتنه کې دواړو لورو د تخنيکي او مسلکي زده کړو ادارې په ارزښت او د دغې ادارې د برنامو د پلي کولو پر څرنګوالي خبرې وکړې.
په دغې کتنه کې د تخنيکي او مسلکي زده کړو ادارې سرپرست د دغې ادارې د لاسته راوړنو او پلانونو په هکله هم خبرې وکړې او ويې ويل چې د فقر له منځه وړل او د ماهر کارې ځواک روزل د دغې ادارې له مهمو موخو څخه دي.
نوموړي د مجاهدینو د روزنیز پلان یادونه هم وکړه، چې د تخنیکي او مسلکي زده کړو ادارې له خوا چمتو شوی او ویې ویل، چې په تطبیق سره به یې مجاهدینو ته د عصري علومو زده کړې زمینه برابره شي.
د تخنيکي او مسلکي زده کړو ادارې سرپرست دغه راز زياته کړه، چې د مجاهدينو د روزنيز پلان له مخې به دوى ته د ۱۲ او ۱۴ سندونه ورکړل شي.
له بل پلوه د سمنګان والي مولوي عبدالاحد فضلي یاد ولايت ته د ښاغلي مولوي غلام حيدر شهامت له راتګ څخه خوښي څرګنده کړه او زياته يې کړه، چې د تخنيکي او مسلکي زده کړو اداره د هېواد په پرمختګ او ځان بسياينې کې ډېر مهم رول لوبوي.
ښاغلي فضلي په سمنګان ولایت کې د تخنیکي او مسلکي زده کړو د مرکزونو د ملاتړ په اړه هم ډاډ ورکړ.
