د بغلان تخنیکي او مسلکي زده کړو آمریت او د رویان خصوصي لوړو زده کړو موسسې ترمنځ د همکارۍ هوکړه لیک لاسلیک شو
د بغلان ولایت تخنیکي او مسلکي زده کړو آمریت په یاد ولایت کې د رویان خصوصي لوړو زده کړو موسسې سره یو هوکړه لیک لاسلیک کړ.
د دغه هوکړه لیک پر بنسټ به د بغلان ولایت تخنیکي او مسلکي زده کړو د مرکزونو فارغان په رویان خصوصي لوړو زده کړو موسسه کې په بېلابېلو څانګو کې په ۲۵ سلنه تخفیف سره خپلو زده کړو ته دوام ورکړي.
همدا راز د لاسلیک شوي هوکړه لیک له مخې د بغلان ولایت تخنیکي او مسلکي زده کړو آمریت او د رویان خصوصي لوړو زده کړو موسسه به د علمي څیړنو، د زده کړیالانو کارآموزشی دورې د بشپړولو او د ګډو علمي – فرهنګي برنامو د تنظیم په برخه کې له یو بل سره همکاري کوي.
