تخنیکي او مسلکي زده کړو په برخه کې د ۸۰۰ زره امریکایي ډالرو پانګونه
د تخنيکي او مسلکي زده کړو ادارې سرپرست الحاج مولوي غلام حيدر شهامت په خپل کاري دفتر کې په افغانستان کې د ناروې کميټې له رئیس "تاريا واتر دال" سره وکتل.
په دې کتنه کې د ناروې کمېټې د تخنيکي او مسلکي زده کړو برخې مسوول طارق دانشیار هم حضور درلود.
د ناروې کميټې رئيس په دې کتنه کې د تخنیکي او مسلکي زده کړو ادارې سره د لاسليک شوي تفاهم ليک د موادو د تطبيق پر څرنګوالي توضیحات وړاندې کړل.
ښاغلي "واتر دال" څرګنده کړه چې دغې کمېټې تر دم ګړۍ د تخنیکي او مسلکي زده کړو له ادارې سره په بېلابېلو برخو کې لکه د ښوونکو د ظرفیت لوړولو، روزنیز نصاب، د کاري وسایلو او تجهیزاتو وېش، ځانګړو زده کړو او د ټولګیو د تجهیز په برخه کې همکاري کړې ده.
دغه راز د ناروې کميټې رئيس زياته کړه چې دغه بنسټ د تخنيکي او مسلکي زده کړو له ادارې سره د همکارۍ ټول لګښت اته ۸۰۰ سوه زره امريکايي ډالرو ته رسيږي.
د دې تر څنګ، د ناروې کمېټې مسوولینو د تخنیکي او مسلکي زده کړو له سرپرست څخه وغوښتل چې د سمپوزیم په تر سره کولو کې دې له دې کمیټې سره همکاري وکړي.
په ورته وخت کې مولوي غلام حیدر شهامت له "تاریا واتر دال" سره په خپلو خبرو کې د تخنیکي او مسلکي زده کړو له ادارې سره د تفاهم لیک موادو د پلي کېدو په برخه کې د ناروې کمېټې له همکارۍ مننه وکړه.
ښاغلي مولوي شهامت همدارنګه د ناروې کمیټې او د تخنیکي او مسلکي زده کړو ادارې ترمنځ د ګډ سمپوزیم د جوړولو په برخه کې د یادې کميتې له غوښتنې هرکلی وکړ.
دواړو لورو توافق وکړ چې د سمپوزیم د ترسره کیدو به برخه کې باید د تخنیکي او مسلکي زده کړو ادارې او د ناروې کمیټې څخه یوه ګډه کاري کمیټه جوړه شي.
