د زراعت او خوراکي توکو د پروسس انسټيټوټ له لوري دوه علمي–عملي پروګرامونه په بریالي توګه ترسره شول
د تخنیکي او مسلکي زدهکړو ادارې اړوند د زراعت او خوراکي توکو د پروسس انسټيټوټ، دوه اړین او ارزښتناک علمي–عملي پروګرامونه د لارښود استاد تر مستقیم نظارت لاندې او د محصلینو په فعاله ګډون سره ترسره کړل.
لومړی پروګرام د انستیتوت په فارم کې د بادرنګو کرل او د پالنې څرنګوالی و، چې محصلینو ته پکې د تخصصي لارښوونو له مخې، د ځمکې چمتووالی، تخم شیندنه او د بادرنګو د لومړنیو پاملرنو پروسه په عملي بڼه وښودل شوه.
په دویم پروګرام کې، محصلینو د خوراکي توکو د پروسس په مجهزه خونه کې، د مربوطه استاد تر نظارت لاندې د چپسو د تولید بهیر له پیل څخه تر پایه په عملي ډول اجرا کړ. د دې فعالیت موخه د محصلینو د تخنیکي پوهې لوړول او د زراعتي محصولاتو د اقتصادي ارزښت درک کول ویل شوي دي.
د یادونې ده چې د تخنیکي او مسلکي زدهکړو ادارې رهبري تل هڅه کوي چې حرفوي زدهکړې عملي کړي او د کار بازار لپاره چمتو، متخصص او ماهر کاري ځواک وروزي. دا ډول فعالیتونه ددې ادارې په اړونده مرکزونو کې د یادې کړنې د تطبیق یوه روښانه بیلګه ده.
