۳۲ تنه محبوسین د فلزکارۍ له لنډمهاله حرفوي پروګرام څخه فارغ شول
د فلزکارۍ څانګې لنډمهاله حرفوي روزنیز پروګرام، چې څه موده وړاندې د سمنګان ولایت د تخنیکي او مسلکي زده کړو آمریت لخوا د یاد ولایت په محبس کې پیل شوی و، پای ته ورسید.
په دې لنډمهاله پروګرام کې، محبوسینو د شپږو میاشتو په ترڅ کې د فلزکارۍ حرفې په برخه کې په مسلکي ډول روزنه ترلاسه کړه او پر تخنیکي او مسلکي زده کړو سمبال شول.
د دې روزنیز پروګرام د اختتامیې په مراسمو کې، د سمنګان ولایت د محبس مسؤلینو د یاد ولایت د محبوسینو لپاره د تخنیکي زده کړو د زمینې له برابرولو څخه قدرداني وکړه.
په ورته وخت کې، محبوسینو هم د دې روزنیز پروګرام له ترسره کېدو څخه خوښي څرګنده کړه، او زیاته یې کړه چې نوموړي غواړي په راتلونکي کې هم د فلزکارۍ په برخه کې خپل حرفوي زده کړو ته دوام ورکړي.
د یادونې وړ ده چې د پروګرام په پای کې، هغو محبوسینو ته چې له دې لنډمهاله حرفوي پروګرام څخه فارغ شوي وو، ستاینه لیکونه هم ورکړل شول.
