د ننګرهار د تخنیکي زده کړو مرکزونو زده کوونکو د عملي زده کړو لړۍ د یاد ولایت په اقتصاد ریاست کې پیل شوه
د ننګرهار ولایت د تخنیکي او مسلکي زده کړو مرکزونو څخه د ادارې او سوداګرۍ، ادارې او مدیریت او بانکدارۍ څانګې زده کونکي د عملي زده کړو ترلاسه کولو لپاره ددې ولایت، اقتصاد ریاست ته معرفي شول.
د ننګرهار ولایت د تخنیکي او مسلکي زده کړو آمریت د مسولینو په وینا، دغه زده کونکي د عملي او نظري زده کړو تر څنګ د مدیریتي د زده کړو په موخه دې ریاست ته معرفي شوي دي.
د یادونې وړ ده چې دغو زده کوونکو د یاد ولایت د اقتصاد ریاست سربیره، د ګمرک ریاست، مستوفیت او د ننګرهار ولایت د سوداګرۍ خونې څخه هم لیدنه وکړه او د بیلابیلو تخنیکي او مسلکي موضوعاتو په اړه یې روزنه ترلاسه کړه.
دا په داسې حال کې ده چې د ننګرهار ولایت د تخنیکي او مسلکي زده کړو آمریت څه موده وړاندې د زده کونکو د پوهاوي او زده کړې کچې لوړولو لپاره د دې ولایت د اقتصاد ریاست او مستوفیت سره د ګډو همکاریو تفاهم لیک لاسلیک کړی.
