د لوګر ولایت د تخنیکي زدهکړو مرکزونو استادانو لپاره د ظرفیت لوړونې پروګرامونه پیل شول
د هېواد د تخنیکي او مسلکي زدهکړو د مرکز زون ریاست خبر ورکوي چې د لوګر ولایت تخنیکي او مسلکي زدهکړو مرکزونو د استادانو او کارکوونکو لپاره د ظرفیت لوړونې پروګرامونه پیل شوي دي.
ټاکل شوې ده چې په دې پروګرام کې استادانو او کارکوونکو ته د بېلابېلو موضوعاتو په اړه مسلکي روزنې ورکړل شي، چې پکې د تدریس اصول، نوې حرفوي زدهکړې، مصنوعي ځیرکتیا او د تدریس مدیریت اړوند موضوعات شامل دي.
د دغه پروګرام ګډونوال استادان او کارکوونکي وایي چې د ظرفیت لوړونې دا ډول پروګرامونه د تدریسي چارو ښه والي لپاره ډېر ګټور دي او د ورته روزنیزو پروګرامونو د زیاتېدو غوښتنه کوي.
دا په داسې حال کې ده چې د تخنیکي او مسلکي زدهکړو ادارې مشرتابه تل د زدهکړو په مرکزونو کې د ظرفیت لوړونې او تدریس مدیریت پر پیاوړتیا ټینګار کړی دی.
