د لغمان ولایت تخنیکي او مسلکي زده کړو مرکزونو فارغانو ته د لوړو زده کړو زمینې برابرول!
په لغمان ولایت کې د تخنیکي او مسلکي زده کړو ادارې مسؤلینو د تابش خصوصي پوهنتون سره د ګډو همکاریو هوکړهلیک لاسلیک کړ، چې موخه یې د یاد ولایت د تخنیکي او مسلکي زده کړو مرکزونو فارغانو لپاره د غوره تحصیلي فرصتونو برابرول دي.
د دې هوکړهلیک پر بنسټ، د لغمان ولایت د تخنیکي او مسلکي زده کړو مرکزونو فارغان کولی شي په ځانګړي تخفیف سره د خپلو زده کړو د دوام لپاره، تابش پوهنتون کې شامل شي.
په ورته وخت کې، د محصلینو د عملي زده کړو لپاره زمینه برابرول او د دواړو ښوونیزو بنسټونو د کارمندانو او استادانو د ظرفیت لوړولو په برخه کې د ګډو ورکشاپونو جوړول د دې هوکړه لیک له موادو څخه دي.
دا په داسې حال کې ده چې د تخنیکي او مسلکي زده کړو ادارې مسؤلین تل هڅه کوي چې د خصوصي او دولتي بنسټونو سره د هوکړه لیکونو په لاسلیک کولو سره د تخنیکي او مسلکي زده کړو مرکزونو زده کونکو ته غوره ښوونیز فرصتونه برابر کړي.
