د غور ولایت د کرنې او وترنري انسټیټوټ محصلینو د کولیک ناروغۍ په اړه عملي زده کړه ترلاسه کړه
د غور ولایت د کرنې او وترنرۍ انسټیټوټ د وترنرۍ څانګې محصلینو ته د دې ښوونیز مرکز په لابراتوار کې په څارویو کې د "کولیک ناروغۍ" په اړه عملي روزنه ورکړل شوه.
په دې درسي جلسه کې، لارښود استاد د کولیک ناروغۍ په اړه علمي توضیحات وړاندې کړل او محصلینو ته یې د دې ناروغۍ نښې نښانې تشریح کړې. محصلیونو هم د ښوونیزو وسیلو په کارولو سره د دې ناروغۍ پورې اړوند عملي موارد مطالعه او تحلیل کړل.
استاد د دې ناروغۍ په اړه د درس په دوام کې محصلینو ته وویل چې؛ کولیک ناروغي په څارویو کې د هاضمي اختلالاتو څخه پیژندل کیږي او کولی شي د نس درد، ناقراري، د اشتها له لاسه ورکول او د څارویو په چلند کې بدلونونو په څیر نښې نښانې له ځان سره ولري.
د تخنیکي او مسلکي زده کړو په مرکزونو کې عملي زده کړې د دې مرکزونو فارغانو ته د کار زمینه برابروي. له همدې امله د تخنيکي او مسلکي زده کړو ادارې رهبري تل د تخنيکي او مسلکي زده کړو په مرکزونو کې د عملي زده کړو پر پياوړتيا ټينګار کوي.
