د جنوب-جنوب-شمال دوه ورځني سمپوزیم د پایلو په اړه د معلومات وړاندې کولو پروګرام ترسره شو
د تخنيکي او مسلکي زده کړو ادارې د تخنيکي او مسلکي چارو مرستيال مولوي غلام سعيد احساس او همدارنګه په افغانستان کې د ناروې کميټې مشر ترايا واټر دال د حکومت د رسنیو په مرکز کې، د یو مطبوعاتي کنفرانس په ترڅ کې د جنوب-جنوب-شمال دوه ورځني سمپوزيم د پايلو په اړه توضیحات وړاندې کړل.
د تخنيکي او مسلکي چارو مرستيال په دې مراسمو کې وويل چې ددغه سمپوزيم د جوړولو څخه موخه د معلوليت لرونکو وګړو په وړاندې د تبعيض، انزوا او منفي برچسپونو ختمول دي.
په ورته وخت کې د ترایا واټر دال چې نن یې په یوه مطبوعاتی کنفرانس کې یې د تخنیکي او مسلکي چارو له مرستیال سره خبرې کولې وویل چې د دغه دوه ورځني سمپوزیم په ترڅ کې هڅه شوې چې علمی ټولنه، د ښوونې او روزنې طرحه جوړونکي، دولتي او غیر دولتي سازمانونه او نړیوال بنسټونه د ننګونو پیژندلو او د عملي راه کارونو د وړاندې کولو په موخه سره یوځای شوي دي.
تر دې وړاندې د تخنیکي او مسلکي زده کړو اداره د ناروې کمیټې او یو شمیر نورو بنسټونو په همکارۍ سره دوه ورځنی سمپوزیم جوړ کړ چې په ترڅ کې یې د معلولیت لرونکو وګړو لپاره د ښو زده کړو او خدماتو د وړاندې کولو پر څرنګوالي خبرې وشوې.
دا په داسې حال کې ده چې د تخنيکي او مسلکي زده کړو اداره هڅه کوي چې د یادې ادارې د ځانګړو زده کړو مرکزونو ته په ټول هېواد کې پراختیا ورکړي.
