د تخار ولایت تخنیکي او مسلکي زدهکړو د کرنې او وترنري څانګې روزنیزو مرکزونو څخه د ۴۱ محصلینو د فراغت مراسم
د تخار ولایت اشکمش ولسوالۍ د کرنې او وترنري مسلکي انسټیټیوټ د څوارلسم ټولګي څخه د ۴۱ محصلینو فراغت مراسم د یاد ولایت د سیمه ییزو مسؤلینو په شتون کې ترسره شول.
په دې مراسمو کې مسؤلینو د تخنیکي او مسلکي زدهکړو د موخو، اهمیت او ګټو په اړه خبرې وکړې او د دې ادارې د علمي پروګرامونو څخه یې خپل ملاتړ څرګند کړ.
ویناوالو د کرنې او مالدارۍ سکتور په وده او پراختیا کې د تخنیکي او مسلکي زدهکړو ادارې په بنسټیز رول ټینګار وکړ او ویې ویل چې فارغین باید د خپلې پوهې او مسلکي مهارتونو څخه په استفادې ټولنې ته خدمت وکړي.
دغه مسؤلینو هیله څرګنده کړه چې د دې ځوانانو په فراغت سره به د تخار ولایت د کرنې او مالدارۍ سکتور ځینې ستونزې حل شي.
یاد مراسم فارغینو ته د ستاینلیکونو په ویشلو او د خیر په دعا سره پای ته ورسیدل.
