د انرژۍ او اوبو انسټیټوټ زده کونکو ته د اصلاحي او فکري روښانتیا « تنویر» پروګرام ترسره شو
د تخنیکي او مسلکي زده کړو ادارې د انرژۍ او اوبو انسټیټوټ د زده کونکو د فکري او فرهنګي روښانتیا « تنویر» لپاره اصلاحي او ښوونیز پروګرام ترسره کړ.
په دې پروګرام کې یو شمیر مقاماتو لکه د ښوونې او روزنې پوهنتون رئیس ښاغلي شیخ الحدیث سید بشیرآغا هاشمي ګډون درلود او ویناوې یې هم وکړې.
ښاغلي شیخ الحدیث سید بشیرآغا په یاد ښوونیز پروګرام کې د وینا پر مهال وویل چې مومنان باید له الهي اوامرو څخه په بشپړه توګه اطاعت وکړي او د اسلام مبارک دین د احکامو څخه هم پیروي وکړي..
د ښوونې او روزنې پوهنتون رئیس څرګنده کړه چې ځوانان باید د سختیو او مصیبتونو پر محال له صبر و زغم څخه کار واخلي. نوموړي دا هم زیاته کړه چې ځوانان دې ته اړ دي ترڅو د هیواد د پرمختګ او ترقۍ په برخه کې ډیر زیار و کوښښ وکړي.
د تخنیکي او مسلکي زده کړو ادارې د ارشاد او دعوت ریاست د مسؤلینو په وینا، دا پروګرام به د سهشنبه او چهارشنبې پر ورځو هم په انرژۍ او اوبو انسټیټوټ کې دوام وکړي.
