د تخنیکي او مسلکي زده کړو ادارې سرپرست او انافي موسسې د مسؤلینو ترمنځ ناسته ترسره شوه
د تخنيکي او مسلکي زده کړو ادارې سرپرست الحاج مولوي غلام حيدر شهامت په خپل کاري دفتر کې په افغانستان کې د انافي موسسې له يو شمېر مسوولينو سره وکتل.
په دې کتنه کې دواړو لورو د همکاریو د پراختیا پر څرنګوالي خبرې وکړې.
د انافي موسسې مسوولینو د تخنیکي او مسلکي زده کړو ادارې سرپرست مولوي شهامت ته د خپلو فعالیتونو او برنامو په اړه په مفصله توګه توضیحات وړاندې کړل او زیاته یې کړه چې نوموړي د هېواد په بېلابېلو برخو کې په ځانګړي ډول د حرفو په برخه کې فعالیت ترسره کوي.
د تخنيکي او مسلکي زده کړو ادارې سرپرست هم د انافي موسسې د فعاليتونو او لاسته راوړنو څخه قدرداني وکړه او همدارنګه څرګنده يې کړه، چې دغه اداره د خلکو د خدمت په موخه ټولې لازمې اسانتياوې برابروي.
په دې کتنه کې د انافي موسسې مسولینو د "نویو لارو" «مسیرهای جدید» پروژې په اړه چې اوس مهال د تخنیکي او مسلکي زده کړو له ادارې سره په همغږۍ او همکارۍ پلي کېږي، توضیحات ورکړل. نوموړو وویل چې دا پروژه د حرفوي پروګرامونو په برخه کې تمرکز کوي.
د دې ناستې په پای کې محترم مولوي شهامت د تخنیکي او مسلکي زده کړو ادارې او انافي موسسې ترمنځ د همکاریو پر لا پیاوړتیا ټینګار وکړ.
دا په داسې حال کې ده چې انافي موسسه اوسمهال د کابل، هرات، پروان او بلخ په ګډون په يو شمېر ولايتونو کې د تخنيکي او مسلکي زده کړو له ادارې سره همکاري کوي.
