د کابل په اتومیخانیکي اکاډمۍ کې د نیالګیو کېنولو کمپاین پیل شو
د تخنیکي او مسلکي زده کړو ادارې، د کابل په اتومیخانیکي اکاډمۍ کې د نیالګیو کېنولو پروګرام د یو لړ مراسمو په ترڅ کې چې د کابل والي الحاج امین الله عبید هم حضور درلود پیل شو.
ښاغلي امین الله عبید په دغه مراسمو کې په خپله وینا کې د اسلام د مبارک دین له نظره سرسبزۍ ته په اشارې سره وویل هېوادوال باید د نیالګیو په کېنولو کې برخه واخلي.
نوموړي وویل د نیالګیو کېنول په آخرت کې د اجر سبب کیږي او یوه صدقه جاریه ده.
همدارنګه، ښاغلي استاذ رفیع الله حبیبي، د کابل ولایت تخنیکي آمر وویل په پلان کې ده چې سلګونه نیالګي د کابل په اتومیخانیکي اکاډمۍ کې کېنول شي.
نوموړي په پروګرام کې د کابل ولایت د چارواکو د ګډون څخه مننه او قدرداني وکړه.
ښاغلي استاذ حبیبي زیاته کړه، نږدې دوه میاشتې کیږي چې د دفاع وزارت انجینرۍ لېوا نیالګیو ته د ځمکې په هوارولو کې د تخنیکي او مسلکي زده کړو له ادارې سره همکاري کوي. نوموړي د دفاع وزارت له مشرتابه څخه هم مننه او قدرداني وکړه.
