د بلخ په سجاديه تخنیکي او مسلکي انسټیټوټ فارغانو د فراغت مراسم ترسره شول
د بلخ ولايت د سجاديه تخنيکي او مسلکي انسټیټوټ د برښنا او ساختماني انجينرۍ له څانګو فارغانو د فراغت مراسم ترسره شول.
په دغه مراسمو کې ځايي چارواکو، علماوو او ځوانانو ګډون کړی و.
د مراسمو په پيل کې د سجاديه تخنيکي او مسلکي انسټیټوټ آمر احمد فواد فايق خبرې وکړې او د تخنيکي او مسلکي زده کړو په اړه يې معلومات ورکړل.
ښاغلي فایق د تخنیکي او مسلکي زده کړو په برخه کې د سیمه ییزو چارواکو او مشرانو د همکارۍ قدرداني وکړه.
په ورته وخت کې د بلخ ولایت د علماوو شورا مرستیال ښاغلي عالمي بلخي د عصري او تخنیکي علومو روزنه د هېواد د پرمختګ لپاره مهمه وبلله او له فارغانو یې وغوښتل چې په اسلامي او ایماني روحیې سره ټولنې ته خدمت وکړي.
نورو ويناوالو هم د تخنيکي او مسلکي علومو پر ارزښت خبرې وکړې او په هېواد کې يې د تخنيکي او مسلکي زده کړو پر ملاتړ ټينګار وکړ.
غونډه فارغانو ته د تصدیق پاڼو په ورکولو سره پای ته ورسیده.
