د تخنيکي او مسلکي زده کړو ادارې د کندز له والي سره وکتل
د تخنيکي او مسلکي زده کړو ادارې سرپرست مولوي غلام حيدر شهامت د کندوز له والي ملا نثار احمد نصرت سره وکتل او خبرې اترې وکړي.
ښاغلي شهامت د کندز له والي سره په کتنه کې د تخنیکي او مسلکي زده کړو ادارې د موخو او برنامو په اړه معلومات ورکړل او ویې ویل چې د کار بازار لپاره د ماهر او مسلکي ځواک روزل د دغې ادارې له مهمو موخو څخه دي.
مولوي شهامت د تخنيکي او مسلکي زده کړو ادارې له خوا د مجاهدينو لپاره د چمتو شوې روزنیزې طرحې يادونه هم وکړه او ويې ويل، چې د دغې طرحې په پلي کېدو سره به د مجاهدينو لپاره د عصري علومو د زده کړې زمينه برابره شي.
د تخنیکي او مسلکي زده کړو ادارې سرپرست د کندز ولایت د تخنیکي او مسلکي زده کړو د مرکزونو ستونزې او ننګونې د یاد ولایت له والي سره شریکې کړې او په دې برخه کې یې د ولایت مقام د همکارۍ غوښتنه وکړه.
له بل پلوه د کندز والي ملا نثار احمد نصرت د تخنیکي او مسلکي زده کړو ادارې د برنامو او لاسته راوړنو قدرداني وکړه.
د کندوز والي دا هم وويل، چې د هېواد د اقتصادي ودې لپاره تخنيکي او مسلکي زده کړې ډېرې مهمې دي.
مولوي نصرت په کندز ولایت کې د تخنیکي او مسلکي زده کړو د مرکزونو د ستونزو د هواري ترڅنګ په دغه ولایت کې د مجاهدینو لپاره د روزنیزې طرحې د تطبیق په برخه کې د همکارۍ ژمنه هم وکړه.
