تخنیکي او مسلکي چارو مرستیال د یو تن ملي سوداګر سره وکتل
د تخنیکي او مسلکي زده کړو ادارې د تخنیکی او مسلکي چارو مرستیال مولوي غلام سعید احساس د هېواد له یوه ملي سوداګر عبدالحمید هلمندي سره وکتل او خبرې اترې یې وکړې.
په دغه کتنه کې چې د پلان او ستراتیژیکو همغږۍ رئیس مولوي نیک محمد نیکمل هم حضور درلود، ښاغلي هلمندي د خپلو فعالیتونو او برنامو په اړه خبرې وکړې.
نوموړي په هېواد کې د کرنې برخې ته په پاملرنې د ټينګار ترڅنګ وويل، چې له هر ډول اقليمي شرايطو سره برابر د پستې زرګونه نيالګي يې وارد کړي او هڅه کوي، چې ترویج یې کړي.
ښاغلي هلمندي زیاته کړه چې په هېواد کې یې د غنمو د تخم د ترویج په برخه کې هم کار کړی او د چرګانو په فارم کې یې دوه میلیونه ډالره پانګونه کړې ده.
هغه ټینګار وکړ، چې د کرنې په برخه کې پانګونه او بزګرانو ته په پاملرنې سره به په هېواد کې بې وزلي له منځه ولاړه شي.
د تخنيکي او مسلکي چارو مرستيال د ښاغلي هلمندي د پلانونو هرکلى وکړ او ويې ويل، چې دغه اداره له ملي سوداګرو سره هر ډول همکارۍ ته چمتو دى.
ښاغلي احساس وویل، د تخنیکي او مسلکي زده کړو اداره د کرنې په برخه کې ۱۲۳ مسلکي لېسې او انسټیټونه لري او سوداګر کولای شي په دغو مرکزونو کې پانګونه وکړي.
