په ټول هېواد کې د مجاهدینو د ادارې او مدیریت پروګرام ښوونیزه لړۍ روانه ده
د تخنیکي او مسلکي زده کړو ادارې محترم مشرتابه د هدایت پر اساس، په یادې اداره کې یوه طرحه تیاره شوه چې د هغې طرحې پر بنسټ د مجاهدینو لپاره په تخنیکي او مسلکي زده کړو په ښوونیزو مرکزونو کې د زده کړو زمینه مساعده شوه.
د دې طرحې پر بنسټ چې د تخنیکي او مسلکي زده کړو ادارې لخوا ترتیب او د ریاست الوزراء مقام لخوا منظور شوې؛ اوس مهال په ټول هېواد کې زرګونه مجاهدین د تخنیکي او مسلکي زده کړو په مرکزونو کې پر مدیریتي زده کړو بوخت دي.
همداراز په دې طرحه کې راغلي چې مجاهدین به د ښوونیزې تثبیت سویې وروسته د ادارې او مدیریت په ښوونیز پروګرام کې چې مجاهدینو لپاره ځانګړی شوی؛ جذب کیږي او هغوی ته به د مدیریتي زده کړو بیلابیل پروګرامونه تدریس شي.
د تخنیکي او مسلکي زده کړو په اداره کې د مسؤلینو په وینا، تر دې دمه زرګونه کسان له دې پروګرام څخه فارغ شوي دي.
بلخوا، مولوي نثار احمد الیاس، د تخنیکي او مسلکي زده کړو ادارې د مطبوعاتي دفتر مسؤول، وایي چې هغه مجاهدین چې د ادارې او مدیریت له ښوونیز پروګرام څخه فارغ شوي، د اسلامي نظام په بېلابېلو برخو کې پر خدمت بوخت دي او دغه ژمن کسان به د همدې زده کړو پر مټ د هیواد لپاره د لازیات خدمت کولو جوګه شي.
نوموړي د مجاهدینو سره د علمي همکاریو په برخه کې د زیاتوالي په اړه ټینګار کوي او زیاتوي چې دا بهیر د هغې طرحې پر بنسټ چې مخکې د تخنیکي او مسلکي زده کړو ادارې لخوا چمتو شوې ده، دوام لري.
د تخنیکي او مسلکي زده کړو اداره په هیواد کې د تعلیمي سکتور له اړینو ادارو څخه ګڼل کیږي. دا اداره اوس مهال په لسګونو ښوونیزو څانګو کې مسلکي او متخصص زده کوونکي روزي او هغوی د اقتصادي ځان بسیاینې لپاره د کار بازار ته وړاندې کوي.
