د پکتیکا ولایت د محبوسینو لپاره درې میاشتنی لنډمهاله حرفوي پروګرام پای ته ورسېد
د موټرسایکل ترمیم څانګې درې میاشتنی لنډمهاله حرفوي پروګرام، چې څه موده وړاندې د پکتیکا د تخنیکي او مسلکي زده کړو آمریت لخوا د یاد ولایت د مرکزی محبس آمریت په همکارۍ پیل شوی و، پای ته ورسید.
د دې پروګرام په اختتامیه مراسمو کې د پکتیکا ولایت یو شمیر سیمه ییزو مقاماتو ګډون درلود او ویناوې هم وکړې.
د پکتیکا د حج او اوقافو رئیس په دې مراسمو کې د وینا پر مهال له محبوسینو وغوښتل چې له هغو زده کړو څخه چې نوموړو د دې روزنیزې دورې په ترڅ کې یې زده کړي دي په سمه توګه ګټه پورته کړي.
په دغه مراسمو کې نورو ویناوالو د دې پروګرام څخه، چې د تخنیکي او مسلکي زده کړو ادارې لخوا د محبوسینو لپاره، ټولنې ته د هغوی د بیا ادغام په موخه پیل شوی و، قدرداني وکړه او د دې ادارې له مسؤلینو یې وغوښتل چې د دغه شان پروګرامونو د پلي کیدو لړۍ ته دوام ورکړي.
د مراسمو په پای کې، د لنډمهاله حرفوي پروګرام فارغانو ته تصدیق لیکونه ورکړل شول، او مراسم د دعایې په ویلو سره پای ته ورسېدل.
