د نیمروز ولایت اړوند د زرنج کرنې مسلکي انسټیټوټ کې د میوو پروسس
د نیمروز ولایت اړوند د زرنج کرنې مسلکي انسټیټوټ زده کوونکو ته د میوه جاتو د «مربا» جوړولو په اړه په عملي بنه روزنه ورکړل شوه.
لارښود استاد په یادې درسي جلسه کې زده کوونکو ته د میوو د ساتلو او پروسس کولو د څرنګوالي په اړه په مفصله توګه توضیحات وړاندې کړل.
نوموړي وويل، د ميوو پروسس د ميوو خرابوالي د مخنيوي او په هېواد کې د کروندګرو (دهاقینو) د عايد د زياتوالي لپاره ډېر مهم او اړين دي.
د تخنيکي او مسلکي زده کړو په مرکزونو کې د زده کړو لویه برخه عملي ده، له همدې امله د یادو مرکزونو فارغان په مستقیم ډول د کار بازار کې په دندو ګمارل کېږي.
دا په داسې حال کې ده چې د تخنيکي او مسلکي زده کړو ادارې مشرتابه تل د تخنيکي او مسلکي زده کړو په مرکزونو کې د عملي زده کړو پر لا پياوړتيا ټينګار کوي.
