د حیواني او نباتي ناروغیو په برخه کې د بهارک کثیرالرشتوي انسټیټوټ زده کړیالانو د عملي زده کړو بهیر
د بدخشان ولایت اړوند بهارک کثیرالرشتوي انسټيټوټ زده کړیالانو ته د یاد ښوونیز مرکز په لابراتوار کې د یوې درسي جلسې په ترڅ کې د «حیواني او نباتي ناروغیو د پېژندنې» په اړه په عملي بڼه روزنه ترلاسه کړه.
نوموړو ته په دې درسي جلسه کې، د استاد له لوري د «حیواني او نباتي ناروغیو د ډولونو، د بیلابیلو حیواني درملو د زرق کولو او په نباتاتو کې د باکتریا د تشخیص کولو» په اړه په عملي ډول زده کړه ترلاسه کړه او د موضوع په اړه یې خپلې پوښتنې او سوالونه هم شریک کړل.
دغه راز په دوام کې لارښود استاد د حیواني او نباتي ناروغیو په برخه کې د محصلینو پوښتنو ته مفصل ځوابونه ورکړل.
د تخنیکي او مسلکي زده کړو په مرکزونو کې د روزنې ډیری برخه عملي ده، څرنګه چې د تخنیکي او مسلکي زده کړو مرکزونو فراغان په مستقیم ډول د کار بازار ته جذب کیږي.
له همدې امله، د تخنیکي او مسلکي زده کړو ادارې رهبري تل د تخنیکي او مسلکي زده کړو په مرکزونو کې د عملي زده کړو پر پیاوړتیا ټینګار کوي.
