د تخنیکي او مسلکي زده کړو ادارې د ښکلو هنرونو او صنایعو انسټیټوټ سل کلن شو
د تخنیکي او مسلکي زده کړو ادارې د ښکلو هنرونو او صنايعو انسټيټوټ د جوړېدو د سلمې کليزې په مناسبت مراسم ترسره شول.
دغه مراسم د تخنیکي او مسلکي زده کړو ادارې مالي او اداري چارو مرستیال مفتي فضل الرحمن فاضل، د هېواد د فوټبال فدراسیون رئیس محمد یوسف کارګر او د تخنیکي او مسلکي زده کړو ادارې د کارکوونکو په حضور کې ترسره شول.
د دغه مراسمو په پيل کې د ښکلو هنرونو او صنايعو انسټيټوټ آمر برهان الدين ميرزايي خبرې وکړې او ويې ويل، چې په دې انسټيټوټ کې اوسمهال په پنځو (ګرافيک، بدنې روزنې، نقاشي، تزئینی سيراميک او د لرګيو صنعت) څانګو کې زده کوونکو ته زده کړې ورکوي.
د ښکلو هنرونو او صنايعو د انسټيټوټ د جوړېدو د سلمې کاليزې د نمانځغونډې په مراسمو کې د تخنيکي او مسلکي زده کړو ادارې مرستيال مفتي فضل الرحمن فاضل د دغه ښوونیز مرکز د مسوولینو د کړنو او هڅو ستاینه وکړه.
د دغې برنامې په دوام کې د فوټبال فدراسیون رئیس محمد یوسف کارګر ورزش او هنر د یوې ټولنې لپاره مهم وباله او ویې ویل: نوموړي د ښکلو هنرونو او صنایعو انسټیټوټ د بدني روزنې له څانګې څخه د ملاتړ ډاډ ورکړ.
د دغه پروګرام په پای کې ګډونوالو خپلې لاسته راوړنې او هنر نندارې ته وړاندې کړ.
