د تخنیکي او مسلکي زده کړو ادارې د علمي بورډ غونډه جوړه شوه
د تخنيکي او مسلکي زده کړو ادارې د علمي بورد غونډه د یادې ادارې د تخنيکي او مسلکي چارو مرستيال محترم مولوي غلام سعيد احساس په مشرۍ جوړه شوه.
په دې غونډه کې د اجنډا سره سم د 1403 هجري لمریز کال د عملیاتي پلان په اړه همغږي او تعدیل وشو. د پلان جوړونې او ستراتیژیکو همغږۍ ریاست له مسوولینو سره د تخنیکي او مسلکي چارو په اړه خبرې وشوې. په دې اړه ګډونوالو خپل نظرونه شریک کړل.
په دې غونډه کې د رياستونو په کاري چارو کې د لاسوهنې د مخنيوي په موخه پرېکړه وشوه، تر څو هر رياست خپل فعاليتونه د بوديجې او د ادارې له اساسي موخو سره سم په معین وقت کې ترسره کړي.
د تخنیکی او مسلکی زده کړو ادارې د تخنيکي او مسلکي چارو مرستيال د دې ادارې د ټولو رياستونو ترمنځ پر لازمې همغږۍ ټينګار وکړ او ويې ويل، چې ټول کارکوونکي بايد د همکارۍ په روحيه عمل وکړي.
غونډه په دعا سره پای ته ورسیده.
