د تخنیکي او مسلکي زده کړو ادارې د اجرائیه مدیرانو لپاره د ظرفیت لوړولو پروګرام ترسره شو
د تخنیکي او مسلکي زده کړو ادارې د کارکوونکو چارو ریاست، په یادې اداره کې د کاري چارو د پیاوړتیا په موخه د کابل ښار د تخنیکي زده کړو مرکزونو تدریسي مأمورینو او د مرکزي هستې اجرایوي مدیرانو لپاره د ظرفیت لوړولو پروګرام ترسره کړ.
په دې ښوونیز پروګرام کې ۳۵ تنه ګډون لري چې نوموړو ته به د دوو ورځو لپاره د پلان جوړونې او راپور ورکولو د اساساتو په اړه روزنه ورکړل شي.
ګډونوالو د دې پروګرام د ترسره کیدو څخه د هرکلی ترڅنګ ټینګار وکړ چې دا ډول ښوونیز پروګرامونه به د هغوی د کاري وړتیاوو په لوړولو کې مهم رول ولوبوي او په اداري چارو کې به د اسانتیا د رامینځته کولو سبب وګرځي.
د کارکوونکو چارو ریاست د مسؤلینو په وینا، د دې پروګرام د ترسره کولو موخه د کارمندانو د ظرفیت او پوهاوي کچه لوړول او د تخنیکي او مسلکي زده کړو مرکزونو د ورځني کاري چارو په برخه کې د اسانتیا برابرول دي.
دا په داسې حال کې ده چې د تخنیکي او مسلکي زده کړو ادارې د کارکوونکو چارو ریاست تل هڅه کوي چې ددې ادارېد کارمندانو د مهارتونو د پراختیا لپاره په راتلونکي کې په دوامداره توګه ورته پروګرامونه ترسره کړي.
