د تخنیکي او مسلکي زده کړو ادارې تعلمی مرکزونو د درسونو پیل زنګ وهل شو
د تخنیکي او مسلکي زده کړو د روزنیز مرکزونو د درسونو پیل مراسم د دغه ادارې مشرتابه په ګډون ترسره شول.
دغه مراسم نن په کابل کې د ادارې او حسابداری په ملي انسټیټوټ (نیما) کې ترسره شول.
د تخنیکي او مسلکي زده کړو ادارې د کاډمیکو چارو مرستیال ښاغلي نورمحمد عزیزي په دغو مراسمو د زده کړو او پوهې پر ارزښت ټینګار وکړ او ویې ویل چې د یوه ښوونځي په پرانیستلو سره به د یو زندان دروازې وتړل شي.
ښاغلي عزیزي زیاته کړه، د تخنیکي او مسلکي زده کړو ادارې رهبري د باکیفیته ښوونیزو خدمتونو د وړاندې کولو په موخه د ښوونکو او زده کوونکو له ستونزو څخه خبر دی او ژر تر ژره به یې د حل په موخه اقدام وکړي.
د تخنيکي او مسلکي زده کړو ادارې مشر ښاغلی مفتي فضل الرحمن فاضل د علم مقام ته په اشارې سره وويل: خداى تعالى په قرآن کريم کې فرمايي، ايا برابر دي، هغه څوک چې پوهيږی د هغو کسانو سره چی نه پوهیږی."
ښاغلي فاضل پر مسئولیت د ټینګار په ترڅ کې د تخنیکي او مسلکي زده کړو ادارې روزنیزو مرکزونو له ښوونکو وغوښتل چې هېواد د بچیانو د روزنې په برخه کې هیڅ راز هڅې و نه سپموی.
هغه وويل: موږ بايد د دې غم ځپلي وطن لپاره خپل مسووليت ادا کړو؛ ځکه چې دغه هېواد له وروستیو جګړو وروسته لیدلی زخمونه سولې او سوکالۍ لپاره درملنې ته اړتیا لري.
