د تخنيکي زده کړو مرکزونو د محصلينو فراغت غونډه جوړه شوه
د تخنیکي او مسلکي زده کړو ادارې له لوري د کابل ولایت د تخنیکي او مسلکي زده کړو له مرکزونو څخه د ۱۲۵۰ تنو محصلینو د فراغت په مناسبت فراغتغونډه جوړه شوه.
په دې مراسمو کې د مقاماتو تر څنګ یو شمېر مېلمنو او د فارغانو والدینو هم برخه اخیستې وه.
د غونډې په پیل کې د مالي او اداري چارو مرستیال ښاغلي مفتي فضل الرحمن فاضل د ځوانانو او د هېواد په پرمختګ کې د نوموړو د رول په اړه خبرې وکړې.
مفتي فاضل په خپلو خبرو کې وویل چې ځوانان د ټولنې اساسي ستن بلل کېږي او باید د هیواد د پرمختګ لپاره ځوانان لا زیاتې هلې ځلې وکړي.
نوموړي دغه راز زیاته کړه چې له تحصیلي او تعلیمي دورې څخه د محصلینو فراغت د نوموړو لپاره یو نوی فرصت دی چې د علم او پوهې زده کړې او پرمختګ ته زیاته پاملرنه وکړي.
په دوام کې یو تن فارغ شوي محصل هم وینا وکړه. نوموړي د تخنيکي او مسلکي زده کړو د مرکزونو له استادانو څخه د مننې او قدر داني ترڅنګ له مسوولينو څخه وغوښتل چې د هېواد د ځوانانو په برخه کې پانګونې ته زياته پاملرنه وکړي.
د یادې غونډې په دوام کې پر یو شمېر نورو اړوندو موضوعاتو هم د ویناوالو له خوا خبرې وشوې او غونډه فارغانو ته د تصدیق پاڼو په ورکولو سره پای ته ورسېده.
