د اکاډمیکو چارو د انسجام بورډ غونډه ترسره شوه
د تخنيکي او مسلکي زده کړو ادارې د اکاډمیکو چارو د انسجام بورډ غونډه د تخنيکي او مسلکي چارو مرستيال مولوي غلام سعيد احساس په مشرۍ ترسره شوه.
په دغه غونډه کې د اکاډمیکو چارو د انسجام بورډ د غونډې تېرې پرېکړې تعقیب او د پرېکړو د ترسره شویو کړنو په اړه اړونده مسوولینو راپور وړاندې کړ.
د غونډې په دوام کې د تخنیکي او مسلکي زده کړو د معیاري انسټیټوټ د جوړولو د طرحې په اړه خبرې وشوې.
د بورډ غړو د یادې طرحې د نهايي کولو، غني کولو او پراختیا په اړه خپل نظرونه شریک کړل.
د تخنیکي او مسلکي زده کړو اداره په پام کې لري چې په کابل کې یو نمونوي معیاري انسټیټوټ جوړ کړي.
د يادونې وړ ده، چې د تخنيکي او مسلکي زده کړو د اکاډمیکو چارو د انسجام بورډ په نننۍ غونډه کې د اسلامي ثقافت مضمون د تدريس په برخه کې د اصلاحي ميکانيزم په ګډون پر يو شمېر نورو موضوعاتو هم خبرې وشوې او لازم تصميمونه ونيول شول.
