د احمدشاه بابا کثیرالرشتوي انسټیټوټ کې لنډ مهاله حرفوي کورس دوهم پړاو پیل شو
د کابل ښار په احمدشاه بابا کثیرالرشتوي انسټیټوټ کې ۱۵۰ تنو لپاره لنډ مهاله حرفوي کورسونو دویم پړاو پیل شو.
په دغه روزنيز کورس کې د موبايل انجينري او خياطۍ زده کړې ورکول کېږي.
د احمدشاه بابا په انسټيټوټ کې لنډ مهاله حرفوي کورس په لومړي پړاو کې ۹۰ تنه وروزل شول، چې هغوی د فراغت تصدیق پاڼې هم تر لاسه کړې.
د تخنيکي او مسلکي زده کړو ادارې د حرفوي برنامو د سمون رئیس عبدالودود هوتک د لنډ مهاله کورسونو پر اغېزمنتيا د ټينګار ترڅنګ وويل، چې د دغه کورسونو د څانګو د زياتوالي لپاره هڅې روانې دي.
ښاغلي هوتک زیاته کړه چې د امکاناتو د نشتوالي له امله د جذب ظرفیت ټیټ دی، هڅه کېږي چې په دغه برخه کې هم د حل لار پيدا شي.
تر دې وړاندې هم حرفوي برنامو د سمون ریاست د مرکز او ولایتونو په انسټیټونو کې څو روزنیزې دورې په لاره اچولې دي.
