د تخنيکي او مسلکي زده کړو ادارې سرپرست په افغانستان کې د يونيسف له مسوولينو سره خبرې اترې وکړې
د تخنیکي او مسلکي زده کړو ادارې سرپرست مولوي غلام حیدر شهامت د ملګرو ملتونو د ماشومانو د وجهي صندوق (یونیسف) د ښوونې او روزنې له مسوولینو جان مد او مېرمن فوزیې سره په خپل کاري دفتر کې وکتل.
ښاغلي شهامت د دغې ادارې د وروستيو لاسته راوړنو په اړه معلومات ورکړل او ويې ويل، چې د نابینایانو لپاره د بريل خط مطبعې فعالول، د تخنيکي او مسلکي زده کړو ادارې د نوښت په مرکز کې د موټر جوړول او د دغې ادارې د مطبعې بيا فعالول شامل دي، د تیرو دوو کلونو له مهمو لاسته راوړنو څخه ده.
همدارنګه مولوي شهامت د ځانګړو زده کړو لپاره د لازمو اسانتياوو او امکاناتو د برابرولو يادونه هم وکړه او ويې ويل، چې د دغې ادارې د ځانګړو زده کړو برخه لا زياتې همکارۍ ته اړتيا لري.
د تخنیکي او مسلکي زده کړو ادارې سرپرست زیاته کړه، د ملګرو ملتونو د وجهي صندوق (یونیسف) او د دې ادارې کارې څرنګوالی نږدې دی او کارونه باید په همغږۍ سره مخ ته یوړل شي.
د دغې لیدنې په دوام کې مېرمن فوزيې د دغې ادارې له وروستيو کړنو او لاسته راوړنو څخه خوښي څرګنده کړه او ژمنه يې وکړه چې د دغې ادارې غوښتنې او وړانديزونه به د يونيسف ادارې له مشرتابه سره شريک کړي.
همدارنګه جان مدد په دې ناسته کې وویل: موږ د خپلو اصولو او قوانینو په رڼا کې له دغې ادارې سره هر ډول همکارۍ ته چمتو یو.
