د تخنیکي او مسلکي زدهکړو ادارې د ادارې او مدیریت له روزنیز پروګرام څخه د ۴۶۶ مجاهدینو فراغت
په ارزګان ولایت کې د تخنیکي او مسلکي زدهکړو ادارې د ادارې او مدیریت له پروګرام څخه د ۴۶۶ تنو مجاهدینو د فراغت مراسم ترسره شول.
په دغه مراسمو کې د تخنیکي او مسلکي زدهکړو ادارې رئیس الحاج مولوي غلام حیدر شهامت او ترڅنګ یې، د یاد ولایت سیمهییزو مسؤلینو هم ګډون او ویناوې وکړې.
محترم الحاج مولوي غلام حیدر شهامت د فراغت په دې مراسمو کې وویل، چې مجاهدینو ته د ادارې او مدیریت د روزنې پروګرام برابرول د افغانستان.ا.ا له لاسته راوړنو څخه دی.
نوموړي په خپلو خبرو کې وویل، چې مجاهدینو لپاره د زدهکړې زمینه برابرول د افغانستان.ا.ا له هغو مخلصو او ژمنو کسانو څخه ملاتړ دی، چې د هېواد د اشغال له امله له زدهکړو پاتې شوي وو.
د تخنیکي او مسلکي زدهکړو ادارې رئیس زیاته کړه، اسلامي نظام د الله لوی نعمت دی او ساتنه یې دروند مسؤلیت دی، چې له ایمان، یووالي او عدالت پرته نه شي ټینګېدای؛ همدارنګه د دې نظام اداره او پایداري علم، سالم مدیریت او سم تدبیر ته اړتیا لري.
هغه له پروګرام څخه د فارغ شویو مجاهدینو په اړه وویل، چې هغوی اوس کولای شي اداري او دفتري چارې په سمه توګه پر مخ یوسي.
الحاج مولوي شهامت همداراز څرګنده کړه، چې د هغو مجاهدینو لپاره د زدهکړې زمینه برابرول کوم چې له تعلیم پاتې شوي وو، د ده له هیلو څخه وه او خوښ دی چې دا هیله یې په پوره کېدو ده.
د غونډې په دوام کې د ارزګان ولایت د لواء قومندان مولوي برهانالدین (بیضاوي) مجاهدینو ته د زدهکړو زمینې برابرولو له امله د تخنیکي او مسلکي زدهکړو ادارې له مشرتابه مننه وکړه.
نوموړي د تخنیکي او مسلکي زدهکړو پر اهمیت ټینګار وکړ او ویې ویل چې د ټولنیز ژوند پرمختګ او سم مدیریت له تخصص او مهارت پرته ممکن نه دی.
هغه د اسلامي تاریخ په یادولو سره زیاته کړه: «د احزابو په غزا کې د خندق د کیندلو پر مهال د سلمان فارسي مسلکي نظر ته اړتیا پېښه شوه او هغه د خپل تخنیکي مهارت له لارې ستونزه حل کړه.»
نورو ویناوالو هم په ټول هېواد کې مجاهدینو لپاره د ادارې او مدیریت روزنیز پروګرام برابرولو له امله د تخنیکي او مسلکي زدهکړو د ادارې له مشرتابه مننه وکړه او د هېواد اقتصادي ځانبسیاینې او پرمختګ برخه کې د تخنیکي او مسلکي زدهکړو رول مهم وباله.
په همدې حال کې د ادارې او مدیریت روزنیز پروګرام فارغان وایي، هیله لري چې د لوړو زدهکړو زمینه ورته برابره شي، په دې اړه د تخنیکي او مسلکي زدهکړو ادارې رئیس وویل چې د لوړو زدهکړو وزارت په دغه برخه کې د همکارۍ ژمنه کړې ده.
د مراسمو په پای کې ددې برنامې مخکښو فارغانو ته جایزې او نورو ته تصدیقنامې ورکړل شوې.
