د بلخ ولایت اړوند سجادیه تخنیکي انسټيټوټ د محصلینو فراغت غونډه جوړه شوه
د بلخ ولايت اړوند د سجاديه تخنيکي او مسلکي انسټيټوټ څخه د ۷۰ تنو محصلينو د فراغت په مناسبت د یاد ښوونیز مرکز لخوا، فراغت غونډه جوړه شوه.
په دې مراسمو کې د بلخ د تخنیکي او مسلکي زده کړو آمریت مسوولینو، سیمه ییزو چارواکو، قومي مشرانو، مخورو او د فارغو شویو محصلینو د کورنیو غړو هم برخه اخیستې وه.
د بلخ ولايت د تخنيکي او مسلکي زده کړو آمر په دې مراسمو کې د تخنيکي او مسلکی زده کړو ادارې د پروګرامونو او وروستيو لاسته راوړنو په اړه په مختصره توګه خبرې وکړې. نوموړي له ځوانانو هم وغوښتل، چې د هېواد د ابادۍ او پرمختګ په برخه کې خپله ونډه په پوره هوډ سره ترسره کړي.
په دې غونډه کې نورو ويناوالو د عصري علومو په ځانګړې توګه د تخنيکي او مسلکي زده کړو په ارزښت چې د بېوزلۍ د له منځه وړلو او د مسلک د رامنځته کولو بنسټ ګڼل کېږي، خبرې وکړې. نوموړو دغه راز ځوانان وهڅول چې په خپلو اړوندو څانګو کې زده کړو ته دوام ورکړي.
د غونډې په پای کې محصلینو ته ستاینلیکونه ورکړل شول او مراسم په دعایې سره پای ته ورسیدل.
