په ټول هیواد کې د استادانو لپاره د ظرفیت لوړونې پروګرام پیل شو
د تخنیکي او مسلکي زده کړو ادارې د استادانو د ظرفیت لوړونې ریاست، په یوه بې ساري اقدام کې، د هیواد په ډیری تخنیکي او مسلکي زده کړو مرکزونو کې د استادانو د ظرفیت لوړونې پروګرام پیل کړ.
اوس مهال یاد پروګرام په کندهار، بلخ، پنجشېر، هرات، نیمروز ، غزني، میدان وردګ، پکتیکا، دایکندی، غور، فاریاب، سمنګان، کندز، بغلان، کنړ، پکتیا اوننګرهار ولایتونو کې پیل شوی دی.
د یادونې وړ ده چې په هیواد کې د تخنیکي او مسلکي زده کړو مرکزونو شاوخوا ۴۵۰ تنه استادان په دې پروګرام کې د ټکره ماسټر ترینرانو لخوا د "کیفیت تدریس" په اړه د ۷ ورځو په ترڅ کې روزنه ترلاسه کوي.
د دې برنامې د ترسره کولو څخه موخه د تخنیکي او مسلکي زده کړو په مرکزونو کې د تدریسي چارو ښه والی او د استادانو د پوهې او پوهاوي کچې لوړول ویل شوي دي.
د تخنیکي او مسلکي زده کړو ادارې د استادانو د ظرفیت لوړونې ریاست د پلان پر بنسټ، ټاکل شوې ده چې یاد پروګرام به ډېر ژر د هیواد په نورو ولایتونو کې هم پیل شي.
