د تخنیکي او مسلکي زده کړو د مرکزونو ښوونکو لپاره روزنیز ورکشاپ پای ته ورسیده
د تخنیکي او مسلکي زده کړو د مرکزونو ۷۵ تنو استادانو لپاره د تدریس اصول او پیداګوژي په اړه پنځه ورځنی روزنیز ورکشاپ پای ته ورسیده.
دغه ورکشاپ په کابل کې د اکمال تخصص په انسټیټوټ کې جوړ شوی و چې د ۱۷ ولایتونو د تخنیکي او مسلکي زده کړو د مرکزونو استادانو په کې برخه اخیستې وه.
د دغه برنامې د پای په مراسمو کې د تخنیکي او مسلکي زده کړو ادارې د تخنیکي او مسلکي چارو مرستیال مولوي غلام سعید احساس او د دغې ادارې د دعوت او ارشاد رئیس مفتي نجم الدین حقاني حضور درلود.
په دغه مراسمو کې ښاغلي احساس د ښوونکو د مسؤلیتونو په اړه خبرې وکړې او ویې ویل چې ښوونکي د پیغمبرانو رسالت مسؤلیت پر غاړه لري.
د تخنيکي او مسلکي چارو مرستیال له استادانو څخه وغوښتل چې د زده کوونکو د اسلامي روحيې د پياوړتيا لپاره هلې ځلې وکړي.
ښاغلي احساس ژمنه وکړه چې په بهر کې به د استادانو لپاره د تحصیلي بورسونو په برابرولو کې هڅه وکړي او په دې برخه کې به له لوړو زده کړو وزارت سره همغږي وکړي.
د تخنيکي او مسلکي چارو مرستيال وويل، چې د استادانو د ظرفيتونو د لوړولو په برخه کې به د مؤسسو د همکارۍ د جلبولو لپاره هڅې وکړي.
د دغه ورکشاپ د پای په مراسمو کې د دعوت او ارشاد رئیس مفتي نجم الدین حقاني هم وینا وکړه او د استاد د مقام په اړه یې خبرې وکړې.
ښاغلي حقاني په خپلو خبرو کې په تقوا، عبادت او د لمانځه پر اهمیت هم خبرې وکړې.
مراسم د خیر دعا په ویلو سره پای ته ورسیدل.
