په میدان وردګو ولایت کې د مبایل ترمیم لنډ مهاله حرفوي روزنیز پروګرام پیل شو
په میدان وردګو ولایت کې د تخنیکي او مسلکي زده کړو ادارې مسؤلینو له لوري د یاد ولایت د پر جلریز کثیرالرشتوي انسټيټوټ کې د مبایل ترمیم لنډمهاله حرفوي روزنیز پروګرام پیل شو.
په دې پروګرام کې د یاد ښوونیز مرکز یو شمیر زده کوونکي ګډون لري، چې د درېیو میاشتو په موده کې به د مبایل رغونې په اړه په عملي بڼه روزنه ترلاسه کړي.
د میدان وردګو ولایت د تخنیکي او مسلکي زده کړو آمریت د مسؤلینو په وینا؛ د دغه ښوونیز پروګرام د ترسره کولو موخه په هېواد کې د پوهې کچې لوړول، د کاري فرصتونو رامنځته کول او د بېوزلۍ کمول دي.
دا په داسې حال کې ده چې لنډ مهاله حرفوي پروګرامونه د تخنیکي او مسلکي زده کړو ادارې له بنسټیزو پروګرامونو څخه ګڼل کېږي، چې تر دې مهاله سلګونه کسان له دغو پروګرامونو څخه فارغ شوي او د کار په بازار کې په عملي توګه پر دندو بوخت دي.
