د کابل افغان ټکنالوژۍ انسټیټوټ د زده کړیالانو فراغت مراسم ترسره شول
د کابل افغان ټکنالوژۍ انسټیټوټ د زده کړیالانو فراغت غونډه د تخنیکي او مسلکي زده کړو ادارې مالي او اداري چارو مرستیال مفتي فضل الرحمن فاضل په حضور کې ترسره شوه. د فراغت په دې دوره کې ۱۲۰ تنه د استاد شاګردي له ډيپارټمنټ او لنډ مهاله حرفوي کورسونو څخه فارغ شول.
په دې مراسمو کې د تخنيکي او مسلکي زده کړو ادارې مالي او اداري چارو مرستيال زده کړیالانو ته د فراغت مبارکي وويله او زياته يې کړه چې په اوسنيو شرايطو کې د هېواد د پرمختګ لپاره د تخنيکي او عصري علومو زده کړه ډېره مهمه ده.
ښاغلي فاضل همدارنګه وویل چې زموږ موخه ولس او هېواد ته خدمت دی او له ځوانانو یې وغوښتل چې له فراغت وروسته د ټولنې د خدمت لپاره کار وکړي.
د دغې برنامې په دوام کې د افغان ټکنالوژۍ انسټیټوټ آمر تاج محمد تلاش خبرې وکړې او ويې ويل چې د مسلک او حرفې زده کړه د ځان بسياينې او د کار د پيدا کولو لپاره مهمه ده.
