د تخنيکي او مسلکي زده کړو ادارې سرپرست د چيني بلاعوضه مرستو له تخنيکي ګروپ سره وکتل
د تخنيکي او مسلکي زده کړو ادارې سرپرست مولوي غلام حيدر شهامت د چين هېواد بلاعوضه مرستو د تخنيکي ګروپ له يوه پلاوي سره وکتل.
په دغه کتنه کې دواړو لورو د دوه اړخیزو همکاریو په هکله خبرې اترې وکړې.
لومړی د چیني پلاوي په افغانستان کې د امنیت د تامین په اړه خوښي څرګنده کړه او ویې ویل چې په افغانستان کې د امنیت ټینګښت به د بیارغونې او پرمختګ لپاره مناسب چاپیریال رامنځته کړي.
دغه راز یاد پلاوي له افغانستان سره د چین هېواد د لا زیاتو مرستو او همکاریو ډاډ ورکړ.
د دغې غونډې په دوام کې د تخنيکي او مسلکي زده کړو ادارې سرپرست د یاد پلاوي له ژمنې څخه د مننې او د تخنيکي او مسلکي زده کړو له ادارې سره د همکارۍ په ترڅ کې وویل چې د افغانستان شرايط د دوه اړخيزو همکاريو لپاره مناسب دي.
همدارنګه په دغه لیدنه کې مولوي غلام حیدر شهامت د تخنیکي علومو په برخه کې د چین هېواد د پام وړ پرمختګونو ته په اشارې سره؛ دغه راز ددغې ادارې دکارکوونکو دظرفيت لوړولو او د نصاب د پراختيا په برخه کې دهمکارۍ غوښتنه وکړه .
د دغې کتنې په پای کې دواړو لورو د جومات او طعام خانې د ودانیو د جوړولو او دغه راز د دغه ادارې د شنو ساحو په اړه خبرې وکړې او چیني پلاوي ډاډ ورکړ چې د دغه وړاندیز د ترسره کولو لپاره بشپړ چمتووالی لري.
