د تخنیکي او مسلکي زده کړو په یو ښوونیز مرکز کې د عملي روزنو د زده کړې دوام
د لغمان ولایت مرکز تخنیکي او مسلکي لیسې د برق څانګې زده کوونکو ته د یاد ښوونیز مرکز د عملي فعالیتونو په ورکشاپ کې د ودانیو د لین غځونې په اړه په عملي بڼه روزنه ترلاسه کړه.
نوموړو ته په دې درسي جلسه کې د " ودانیو د لین غځونې څرنګوالي او همدارنګه د سویچ، سرکت او فیوز د نصبولو په شمول د بیلابیلو اړونده موضوعاتو" په اړه په عملي او نظري شکل روزنه ورکړل شوه.
دغه راز د روزنې په جریان کې، زده کوونکو په عملي توګه د استاد لارښوونې تعقیب کړې او خپلې پوښتنې یې شریکې کړې.
د مفاهیمو د ښه پوهیدو لپاره د زمینې رامینځته کولو سربیره، عملي زده کړې د زده کونکو هڅونې او د بیلابیلو علومو د غوره زده کړو کې د نوموړو د لیوالتیا زیاتولو په برخه کې هم مرسته کوي.
له همدې امله، د تخنیکي او مسلکي زده کړو ادارې رهبري تل هڅه کوي چې د تخنیکي او مسلکي زده کړو په مرکزونو کې د عملي زده کړو لړۍ نوره هم پیاوړې کړي.
