د تخنیکي او مسلکي زده کړو ادارې د مشرتابه پلاوي غونډه ترسره شوه
د تخنيکي او مسلکي زده کړو ادارې د مشرتابه پلاوي غونډه د دغه ادارې د سرپرست مولوي غلام حيدر شهامت په مشرۍ د مرستيالانو په حضور کې ترسره شوه.
د دغه ناستې په پیل کې د مشرتابه پلاوي د تېرې غونډې پرېکړې تعقیب او اړونده رئیسانړ د پرېکړو د تطبیق په هکله یې راپور وړاندې کړ.
ورپسې د تېر کال د لاسته راوړنو د راپور په هکله چې د حکومت د رسنیو په مرکز کې وړاندې کېږي، بحث وشو او د پلان ریاست د دغه راپور په اړه معلومات ورکړل.
همدارنګه په معارف تلویزیون کې د تخنیکي او مسلکي زده کړو د مرکزونو د نوښتګر زده کوونکو د معرفي کولو برنامې اړه هم خبرې وشوې او پریکړه وشوه د زده کړیالانو نوښتونه چې باید معرفي شي، د رسنیو تر پوښښ لاندې ونیول شي.
د غونډې په دوام کې له اجنډا سره سم معیاري انستیتیوت د جوړولو لپاره د بودجې د ټاکلو په موخه د مطالباتوکمیټې د سفر په شمول د ولایتي سفرونو په اړه بحث وشو.
د دغه غونډې د پرېکړې له مخې، د وخت او بودجې د سپما په خاطر باید د ادارې مطالباتو د بررسي کمېټه یوازې زونونو ته سفر وکړي.
د نورو موضوعاتو په اړه لازم تصمیمونه ونیول شول او غونډه د خیر په دعا ویلو سره پای ته ورسیده.
